ʻO ke Kōmike Kapa Inoa ka maka ihe e hulā ana ma kahi ʻaoʻao o ke ʻākeʻakeʻa haole nāna mahele i ke kanaka mai ona pili kūʻauhau, pili akua, pili ʻāina hoʻi ma o ke kapa ʻana i nā inoa i loua hēkau Kanaka Maoli. Ma ka hana a me ka noiʻi e ʻike ai nā lālā CWG i ke kohu o ka inoa i ka ʻŌiwi e hea ʻia nei. Ua kapakapa ka nohona o nā manu, nā mea kanu, nā limu, nā koʻa a me nā wahi pana o Papahānaumokuākea he nui wale i ke kapa ʻia ʻana he inoa Kanaka.
Na ka lonoa o ke kino, ka lonoa o ka naʻau a me ke kahu ʻana o nā pilina i ua mau mea ola lā me nā wao a lākou e luana ana ke kaʻi i ko mākou kapa inoa ʻana.
He 70 a ʻoi inoa i kapa ʻia na ke Kōmike Kapa Inoa. ʻO nā iʻa ʻoe, ʻo nā limu ʻoe, ʻo nā koʻa ʻoe, ʻo nā mea kanu ʻoe, ʻo nā manu ʻoe a me nā wahi pana hoʻi o Papahānaumokuākea. E mākaʻikaʻi iho i ka waihona inoa, kekahi hōʻailona o ke ola o ka ʻōlelo kanaka ma Papahānaumokuākea.
ʻO ka inoa ʻo Papahānaumokuākea ua kapa ʻia na kekahi o nā kūpuna o ka CWG, ka laeʻula Dr. Pualani Kanakaʻole Kanahele, no ke kumulipo ʻana o ka lāhui kānaka iā Papa lāua ʻo Wākea. E ʻole lāua e Hawaiʻi ai ka Hawaiʻi a na lāua hoʻi e kahu i ke ola a me ka make, ke kupu ʻana o ka moku ā i kona honowā ʻia ʻana ā pahono hou ʻia.
